Kamora ho thakgolwa Soweto le dibaka tse mabapi, mokgatlo wa Operation Dudula o ikakgela kahara Free State. Lekala la pele la Free State le thakgolwa semmuso motseng wa Sasolburg ka Sontaha sena.
Operation Dudula ke mokgatlo o kgahlano le melata e keneng kahare ho Afrika Borwa ntle le tumello le ba se nang ditokomane tse molaong. Hape-hape mokgatlo ona o lwantshana le mathata a mang a tobane le setjhaba a jwaloka dithetefatsi le botlokotsebe.
Mokgatlo ona o thehilwe ke bahlabani ba mehleng ba sesole ho tswa mekgeng e fapaneng ya dipolotiki.
Operation Dudula e ipolela ha maikemisetso a yona a maholo ke ho lwantsha mathata le diphephetso tsa baahi tse kang botlokotsebe, tshebediso le thekiso ya dithethefatsi, tsosolotso ya moruo wa metse le tse ding.
Mohokahanyi wa Operation Dudula Sasolburg Mbongeni Mayekiso, o boletse ha motse ona wa Sasolburg hammoho le e mabapi e kang Zamdela, Deneysville hammoho le Oranjeville tse welang Masepaleng wa Metsimaholo di hloka mokgatlo ona haholo ho thusetsa phepetsong tseo ba tobaneng le tsona jwaloka baahi.
“Boholo ba batho ba bontshitse thahasello ho Operation Dudula le hore e ka thusa haholo twantshong ya botlokotsebe, dithethefatsi le mathateng a mang ao baahi ba tobaneng le ona” ho rialo Mayekiso.
Ho ya ka Mayekiso ditlhophiso di tsamaya hantle bakeng sa tshebetso ya ka Sontaha ya ho theha lekala Sasolburg.
“Ka Sontaha pele ho ka thewa lekala semmuso re tla kena mohwantong o tla tloha sebakeng se bulehileng mahareng a Sentra le Zio ho fihlela kamora lebenkele la Shoprite moo re tla nehelana ka lenane la ditletlebo ho baemedi ba mafapha a fapaneng a mmuso e be re tswella pele ka mosebetsi wa letsatsi e leng ho theha lekala la semmuso mona Sasolburg” ho phethela Mayekiso
