Kamora dilemo tse leshome le metso e tsheletseng banka ya Absa e le motshehetsi e moholo wa bolo ya maoto kahare ho Afrika Borwa, dikamano tsa banka ena le Premier Soccer League di fihlile qetellong. Ha sehla sena se hodimo sa dipapadi se kodumela se tla be se wela jwalo le tshehetso ya ditjhelete ya Absa. Nako ya tumellano ya Absa le Premier Soccer League e tla be e fihla pheletsong le yona.
Ho ya ka tlaleho ya Premier Soccer League, banka ya Absa e bile le seabo bolong ya Afrika Borwa nako ya dilemo tse 16 mme ho tse 13 tsa tsona ebile motshehetsi wa ditjhelete wa Absa Premiership ho tloha ka 2007.
“Re bile le setswalle se behileng ditholwana tse ntle le PSL mme re tsheheditse mosebetsi wa PSL wa bolo Afrika Borwa le ntshetsopeleng ya papadi ena. Leha e le mona re ke ke re sa ba motshehetsi wa sehlooho was PSL empa bolo e tla dula e le thatohatsi ya pelo tsa rona. Re ntse re sheba mekgwa e meng eo re ka ntshetsang setswalle sa rona le PSL ka yona.
“Re rata ho leboha PSL le setjhaba sohle sa papadi ya bolo ka kamano tse bileng ntle nakong ena yohle,” ho boletse Daniel Mminele, Chief Executive of Absa Group.
“Nako ya Absa Premiership e tla dula e le eo re tadimang ho yona jwale ka nako ya bokgabane ba bolo ha ho tla nalaneng ya ntshetsopele ya dihlopha le dibapadi ka ho tshwana. PSL e motlotlo ka se entsweng ke Absa ka ho matlafatsa league hore e fihlele boemo ba professional,” ho boletse ho Modulasetulo wa PSL, Dr Irvin Khoza.
“Nako ya ho tloha 2007 ho fihlela 2020 e tla dula e le mehopolong ya barati le batshehetsi ba bolo jwaleka nako e bileng sehlohlolong sa PSL,” ho rialo Dr Khoza. Mohlodi wa ditaba – Premier Soccer League
