Lelapa la ha Sebiloane le sebakeng sa Phomolong Namahadi Frankfort, le ile la sala le eme le monna wa
mateneng ka mora ho tjhellwa ke mokhukhu wa kamore tse hlano.
Nakong ya ketsahalo eoNtate Kaladi Sebiloane, mofumahadi wa hae Feiki Tsotetsi le bana ba bona ba bane ba dilemong tse mahareng a tse tharo(3) ho ya ho tse mashome a mabedi le motso o le
mong(21), ba ne ba se teng hae ba le polasing moo Ntate a sebetsang teng.
Ke mora wa Sebiloane e leng Smangaliso ya dilemo di mashome a mabedi le metso e
tsheletseng(26) ya neng a setse lapeng nakong ya ketsahalo.
Ka lehlohonolo Smangaliso oile a phonyoha malakabeng ao a mesong ya letsatsi leo la la 18 Phupu 2022 ka maqeba a manyenyane. Smangaliso o hweleditswe le ho tsoswa ke baahisane hoba ba elellwe hore ho
ya tjha. Lelapa le ntse le eme hloho ka sesosa sa mollo oo.
“Moya wa ka o bohloko haholo ka se na se re hlahetseng, mme re ntse re sa tsebe sesosa sa mollo ona o re senyeleditseng tsohle tseo re neng re se re di bokelletse jwaloka lelapa,” ho rialo Sebiloane. Lelapa lena le boetse la lahlehelwa ke ditokomane tsa boitsibiso le mangolo a bohlokwa a bana sebuping seo sa mollo. Baahisane ba boletse ha tlhokeho ya metsi sebakeng seo sa Phomolong se eketsa mathata a bona haholo.
Ha metsi a ne a le teng tshenyeho e kgolo e ka be e qobilwe, empa ka bomadimabe pompo tsa metsi di ne di boetse di omile hape tsatsing leo.
Mokgatlo wa Democratic Alliance masepaleng wa Mafube o etetse lelapa lena ho lekola tshenyehelo le ho bona hore ba ka thusetsa jwang. Moemedi wa mokgatlo oo ebile e le molekgotla Fako Tsotesi o boletse ha ba kgathatsehile haholo ke se hlahetseng lelapa lena.
“Re le mokgatlo re tla bona ho ya pele hore lelapa le ka thuseha ha jwang ka ditlhoko tse ding, re ntse re phahamisa kgafetsa masepaleng phepetso tse bakwang ke tlhokeho e phethahetseng ya metsi mona Phomolong, re dumellana le baahi hore ha phepelo ya metsi e ne e le teng tsatsing leo tshenyeho e kgolo e ka be e qobilwe” ho rialo Tsotetsi. Mokgatlo o nehelane ka diaparo, disebediswa tsa ka kitjhineng tse kang dijana, dikgaba jwalojwalo, dikobo le tse ding.
