Letsholo la kopanelo la bahlanka ba Sepolesa sa Parys, mohlanka wa melawana wa Masepala wa Ngwathe, Lekala la tsa Tshireletso ya Bareki la DESTEA le Milestone Beverages le utullotse dino tsa maiketsetso tse seng molaong tsa mefutafuta toropong ya Parys.
Bahlanka bana ba molao ba hlasetse sebaka sa thekiso mmileng wa Kort, Parys kamora ho longwa tsebe ka thekiso ya dino tsa maiketsetso tse tahang tse seng molaong sebakeng seo. Kamora dipatlisiso sehlopha se ile sa tswelapele mme sa hapa mefuta-futa e fapaneng ya mabotlolo a dino a seng molaong a ka lekanyelwang diketeng tsa diranta.
Mosadi ya dilemo tse 46 eo ho sollwang e le monga sebaka seo o ile a otlwa ka tefiso ya diranta tse kete tse pedi ka tlasa molao wa Pahlo tsa Maiketsetso, Counterfeit Good Act No. 37 of 1997 Section 2 (1)(a).
Mokomishinara wa Fezile Dabi District Major General Moses Makubo o kgalemetse ka bohale ketso tsa mofuta ona wa ditlolo tsa molao tse etswang ke barekisi, mme a boela a kgothalletsa baahi ho fadimehela ketso tsena nakong eo ba rekang. “Matsholo a tekolo ya tumello le tlhokomediso a tla a tla etswa kahara setereke sena kgafetsa ho tshireletsa baahi ho nwe dino tsena tsa maiketsetso tse ka kenyang maphelo a bona kotsing” ho rialo Makubo.
