Papadi ya mantsiboyeng a Mantaha, 17 Phato 2020, pakeng tsa Cape Town City le Mamelodi Sundowns, e bontshitse kamoo dintho di sa kopaneng kateng ho Bomampodi ba Premier Soccer League.
Cape Town City e ile ya tsietsa Mamelodi Sundowns ka ho e hlola ka 3 – 2 stediamong sa Loftus Versfeld, Tshwane.
Sundowns e iphumane e hula ka thata papadi ena eo e neng e hloka dintlha tse tharo ka hohle-hohle hore e tle e kwale sekgeo pakeng tsa yona le Kaizer Chiefs, e ntseng e di hula pele ho log ya Absa Premiership.
City e ile ya hlanna ya tsietsa Sundowns papadi e sa thakgoha hoo e kgonneng ho hlaba ntlha ya yona ya pele motsotsong wa bo 13 papadi e qadile ka leoto la Bradley Ralani, eo a ileng a boela a hlaba ntlha ya hae bobedi ya papadi motsotsong wa 54. E nngwe ntlha e tlile ka Kermit Erasmus motsotsong wa 44 wa papadi.
Ntlha ya pele ya Sundowns e kene kamora hoba City e itlhabe ka lerumo ka sebapadi sa yona, Edmilson Dove, mme ya bobedi e kene motsotsong wa ho qetela wa papadi ka Keletso Makgalwa.
Ena e bile papadi ya boraro eo Sundowns e hlolehileng ho e hapa esale hoba dipapadi di simolohe kamora ho emiswa nakwana ka baka la Covid-19. E papetse ka ho lekana papading tse pedi e leng ya Orlando Pirates (0 – 0) le Highlands Park (1 – 1).
Ka lehlakoreng le leng, Kaizer Chiefs e butse sekgeo sa dintlha tse 6 ka hodimo ho log kamora ho hlola Polokwane City ka dintlha tse 3 – 2 tsatsing la Moqebelo.
Chiefs e boemong ba pele ka dintlha tse 52 kamora dipapadi tse 24, bobeding ke Sundowns ka dintlha tse 46 ka papadi tse 24 le yona.
Tsatsing la Laboraro, 19 Phato 2020, Chiefs e teana le sehlopha sa Bloemfontein Celtic stediamong sa ABSA Tuks.
