Maikemisetso a sehlopha se ka hodimo ho Absa Premiership log e leng Kaizer Chiefs a ho eketsa sekgeo ka ntlha tse robong a ile a nyopa. Sena ke mora ho tlontlollwa ke Bloemfontein Celtic, Siwelele sa Masele, Absa Tuks Stadium bosiung ba Laboraro.
Siwelele se shasharile Amakhosi ka ntlha tse tharo ho e le nngwe (3 – 1). Amakhosi e bile yona ya pele ya ho otla letanta ka Eric Mathoho motsotsong wa 35 wa karolo ya pele ya papadi.
Empa ntlha eo ha e ya ka ya diha Celtic moya kaha e ile ya boya ka sekgahla se seholo ya hlasela Chiefs ho fihlela e fumana ntlha ya yona ya pele nakwana fela pele ho kgefutso. Ntlha eo e kene ka Sera Motebang.
Karolong ya bobedi ya papadi, Siwelele e kgutlile e tuka malakabe haholo. E kgutlile e hlasela Amakhosi. E thuba lebota la bona la morao le neng le sa tsitsa.
Ke karolong eo ya bobedi moo e hlabileng dintlha tse pedi ha Sera Motebang a neng a boela a akgela ntlha ya hae ya bobedi ya letsatsi, motsotsong wa 48 wa papadi. Ntlha ya boraro yona e kene ka Victor Letsoalo, motsotsong wa 74 wa papadi.
Amakhosi e ne e hopotse ho ka bula sekgeo sa ntlha tse robong pakeng tsa yona le Mamelodi Sundowns, e boemong ba bobedi ho log, empa ha ho ya ka ha e ba jwalo.
Dintlha di ntse di tsheletse tse arolang Chiefs le Sundowns. Chiefs e se e bapatse papadi tse 25 ka dintlha tse 52, Sundowns yona e bapatse 24 ka dintlha tse 46.
Sundowns e teana le Maritzburg United hosane, Labohlano. Chiefs e shebana le Stellebosch FC papading ya yona e latelang ka Sontaha, 23 Phato 2020.
