Beke ena ke beke ya kgalalelo. Ho tloha ka Mantaha ho fihlela hosane ka Sontaha. Re matsatsing a Paseka. Matsatsi ao e leng sehopotso le tsoseletso ho Bakreste bohle ba dumelang ho Modimo le Jesu Kreste.
Mattheu 26:1-5 e hlalosa morero o moholo wa Baprista le Bangodi wa ho rera ho tshwara Jesu le ho mo thakgisa. Athe ho Luka 23 ke moo Jesu a ile a iswa Lekgotleng mme re bona hara qoso tsohle a tsekiswa hore o rata ho iketsa Morena. Hona ha etsa hore qeto e fihlelwe a thakgiswe.
Lefu la Morena Jesu, tsoho ya hae le nyolohelo ya hae lehodimong ke molaetsa wa bophelo ho rona batho, e leng se bolelang Paseka.
Modimo o re file monyetla wa ho bona lerato la hae ka ho dumela ho Morena Jesu, hore re boelane le yena. Jesu Kreste ke Morena wa marena, ha re dumeleng ho yena ho bona bophelo bo sa feleng. Bekeng ena kgopotso ya taba tsena ke tsoseletso ho batho bohle, le keteko ya tlholo ho ba Kreste.
