Tlaleho ka Moqolotsi wa Ditaba wa Puisano
Ebile mafelo a beke a tletseng masisapelo le mahlonoko nakong eo batho ba bane ba neng ba timella kotsing ya koloi haufi le toropo ya Villiers e ka Leboya ho Free State.
Letona la Tshireletso ya Setjhaba, Mebila le Dipalangwang Free State MaQueen Letsoha-Mathae, le fetisitse molaetsa wa lona wa kutlwelo bohloko ho malapa a anngweng ke kolsi ena e etsahetseng ka Moqebelo.
Kotsi ena e etsahetse mmileng wa R26 dikilometara tse ka bang tse hlano ho tloha Villiers e ka.
Kotsi ena e etsahetseng nakong tsa bo 20:30 e ama makoloi a mabedi, koloi e bobebe (Light Motor Vehicle -LMV) ka di nomoro tsa boingodiso MV 704, le koloi ya (Light Delivery Vehicle-LDV), ka di nomoro plata tsa HZC 579 FS.
Ho utlwahala ha mokganni wa LMV a ile a lahlehelwa ke taolo ya koloi mme a kena hlakoreng la makoloi a tlang ka pele. Athe ha e le mokganni wa LDV a leka ho qoba hore makoloi a se thulane sa dipheleu mme seo sa baka hore LDV e neng e palamisitse batho ba mashome a mabedi(20) e lebile Villiers e phetohe.
Kotsi ena e bile sesosa sa ho timela ha batho ba bane, bontate ba bararo ho kenyelletswa le mokganni, hammoho le motho wa mme a le mong. Bohle ba ne ba palame ho LDV. Batho ba babedi ba lahlehetswe ke bophelo sebakeng sa kotsi, ha ba bang ba babedi ba hlokahalletse sepetlele
Bapalami ba bang ba leshome le metso e mene(14) ho tswa makoloi ao a mabedi ba lemetse mme ba potlakisetswa sepetleleng sa Mafube se Frankfort ho fumantshwa pheko. Sepolesa sa Villiers se hlahletse nyewe ya polao ka maikemisetso ka nomoro ya diphuputso e reng 09/09/2023.
Letona MaQueen Letsoha-Mathae o kgothaleditse baahi ho ema mmoho le ho tshehetsana nakong ena ya masisapelo.
Letona le botse la took etsa bohlokwa ba ho hlompha melao ya tsela ho thibela kotsi tse tshwanang le ena ho etsahala.
“Polokeho mebileng ke maikarabelo a rona bohle, mme re tlameha ho bapala karolo ho netefatsa polokeho ya rona le ya basebedisi ba bang ba tsela”
