Tlaleho ka Lekgotla Mokoena
Qeto ya ho batla mokena dipakeng kabong ya dithuso tsa dihwai e bakile motswebere kahara Free State. Dihwai tsena di hanana le qeto ya Letona la Temo la Free State, Saki Mokoena, ya ho tlosa taolo ya kabo ya dithuso tsa temo tlasa lefapha ho e beha taolong ya moemedi ya kantle ho lefapha ya ikemetseng.
Dihwai di batla lefapha la Temo e nne e be lona le abang dithuso tseo e seng motho ya ikemetseng eo ya tla kena ka tsela ya thendara bakeng sa mosebetsi oo. Mekgatlo ya dihwai Free State e lomahantse meno ka le reng setsweng ke hole ha di eme di botse.
Mekgatlo ena e leng African Farmers Association(Afasa), National African Farmers Union(Nafu), hammoho le Vtystaat Landbou e hlalosa ha mokgwa ona o motjha o kenyeleditseng thendara o tla beha dihwai ka mosing.
Afasa e ipileditse ho Letona ho akofa ho ikopanya le bona ho tla lokisa taba ena. “Jwalokaha nako ya ho jala e se e fihlile mokgatlo wa rona o ipiletsa ho Letona ho kopana le dihwai ho rarolla le ho hlakisa ho ntshwa ha dipapatso bakeng sa thendara ya lenaneo la metjhini ya dihwai hammoho le tieho bakeng sa Farmers Input Grants” ho rialo Realeboha Mokhethi wa Afasa.
Athe Nafu yona e boletse ha e lemohile taba tsena tse etsahalang Lefapheng mme e di nka e le tse hlokolotsi haholo. “Re nka taba ena ya ho abuwa ha di thuso tsa dihwai ka maikutlo a tebileng haholo, re boela re toboketsa hore tieho ya ho aba dithuso tsena e tla ba le ditlamorao tse busula haholo ho tsamaeng ha nako. Mohato wa ho kgutlisetsa motho wa boraro ka tsela ya ho thendara o lebisa ho hloleheng le ho putlameng ha lenaneo leo la thuso bakeng sa dihwai” ho rialo Rev Otto Mbangula.
Vrystaat Landbou yona e re maloko a yona a kgathatsehile haholo ke mokgwa ona o motjha mme ba kgothalletsa Lefapha ho tswelapele ka mokgwa o neng o ntse o sebediswa lemong tsena tsa ho feta wa Voucher. “Mokgwa ona o motjha o tla tlisa ditieho ho dihwai mme di tla fetwa ke nako ya bona ya ho jala, mme ne re kopa Letona ho kgutlela ho rona pele ho la di 15 Lwetse kapa ho biletswa kopanong le ba nka karolo bohle” ho rialo Jack Armour.
Afasa e re e kgathatsehile haholo hore ba nka karolo le dihwai ha ba kenyelletswa qetong tsa leano lena la phano e leng(Grant Scheme).
