Mopresidente wa naha, Monghadi Cyril Ramaphosa, o phatlaladitse hore maemo a ho kginwa ha tse ding tsa ditshebeletso le ho ho qobella baahi ho dula malapeng a tla theohela mohatong wa boraro ho tloha ho a bone mathwasong a kgwedi e tlang ya Phupjane.
Phatlalatso ena Mopresidente o e entse puong ya hae ka ho tloloho tsatsing la Sontaha, 24 Mmesa 2020.
Sena se tla kamora hoba tsohle di emiswe ntsi kahare ho Afrika Borwa mme le baahi ba qobellwe ho dula hae ho tloha kgweding ya Hlakubele monongwaha. Nakong eo naha e bile mohatong wa bohlano, mme ya theoha jwalo ho tla mohatong wa bone, mme jwale e se e leba ho wa boraro.
“Ho ya mohatong wa boraro ho bolela hore ho tla bebofatswa dipehelo tsa metsamao ya batho le ho dumella bongata ba dikgwebo ho simolla ka tshebetso ha ka lehlakoreng le leng re ntse re matlafatsa dibaka tsa kokelo le ho kenya tshebetsong mekgwa e meng e ka thusetsang,” ho rialo Ramaphosa.
Leha ho le jwalo, Mopresidente o hlokomedise hore le ha e lo mona Kabinete e nkile qeto ya ho ya mohatong wa boraro ho ntse ho e na le dibaka moo mathata a Coronavirus a ntseng a atile teng.
O boletse hore dibaka tseo di tla nkuwa e le dibaka tse ntseng di le tsietsing, mme tsona ke tse latelang: – Tshwane, Johannesburg, Ekurhuleni, Ethekwini, Nelson Mandela Bay, Buffalo City le Cape Town. Tse ding hape ke boMasepala ba West Coast, Overberg le Cape Winelands mane Western Cape, Setereke sa Chris Hani, Eastern Cape, hammoho le sa iLembe district, KwaZulu-Natal.
Ho ya ka Ramaphosa tulo e leng maqakabetsing ke e bang le ditshwaetso tse hlano ho bathong ba 100 000 kapa moo ditshwaetso di etsahalang ka sekgahla se phahameng.
“Re kgathatsehile haholo ka maemo a Cape Town hammoho le Western Cape ka kakaretso, eo jwale ditshwaetso tsa yona e leng halofo ya ditshwaetso tse etsahetseng mona naheng. Ena ke taba eo re sebetsanang le yona kahohlehohle,” o boletse jwalo.
Mohato wa boraro o bolela hore bongata ba dikgwebo di tla dumellwa ho bula, bongata ba basebetsi ba mmuso ba tla kgutlela mesebetsing, batho ba tla kgona ho ka ikwetlisa ntle le dipehelo le batho ba hlokang ho fumana dijo le thuso ya bongaka ba tla dumellwa ho tsamaya.
Mohatong ona ho tla dumellwa le thekiso ya jwala empa ka dinako tse itseng le teng bakeng sa hore bo ka nwellwa malapeng. Haele thekiso ya kwae e ntse e sa dumellwa.
Ramaphosa o entse boipiletso ba hore batho ba sa hlokeng ho ya mosebetsing kapa ditsheng tsa thuto ba nne ba dule mahae.
