Tlaleho ka Lekgotla Mokoena
Mongodi Kakaretso wa Mehleng wa African National Congress Ace Magashule o ntse a ipatla lepatlelong la dipolitiki. Maikemisetso ke ho boya ho boya sekwele leha ho e na le polelo e reng monna ha a bone habedi.
Magashule o epile pitso tsatsing la Laboraro lena la di 30 Phato 2023 motseng wa Soweto seterateng se tummeng sa Vilakzai ho tla tsebisa bokamoso ba hae dipolotiking hammoho le bomphato wa hae.
Kamora ho hatiswa kosene mokgeng wa ANC kgweding ya Tshitwe ngwahola, Magashule o hana ho tella ruri. Ho bonahala hore kgetlong lena o tla nka qeto e reng mphephe e ya lapisa, motho o kgonwa ke sa hae. E se e le nako a ntse a hanyetsana le menyenyetsi e reng o batla ho ipulela mokga wa hae.
Magashule ke e mong wa ditho tsa mehleng tsa ANC tse seollang mokga ona phatlalatsa.
Magashule e bile mongodi kakaretso wa ANC ho tloha ka 2017 ho fihlela ka yona Tshitwe 2022. Ebile Tonakgolo ya Profensi ya Free State ho tloha ka 2009 ho fihlela 2018. Hape e bile setho sa komiti e kgolo ya ANC ka nako e telele ho tloha mme o sebeditse ka tlasa boetapele ba Nelson Mandela, Thabo Mbeki, Jacob Zuma le Cyril Ramaphosa
