Mahlatsipa a supileng a ileng a bolawa ka sehloho polasing ya Lismor e Kestell a bolokilwe
sebakeng sa bona sa ho qetela mafelong a beke ena ya ho feta ka la 23 Phupu 2022.
Letona la Temo, Ntjhafatso ya Mobu le Ntshetsopele ya metse ya mahae Thoko Didiza
hammoho le Tonakgola ya Foreisitata Sisi Ntombela ba bile teng ho tshidisa le ho felehetsa
bafu bana e leng Nokufa Portia Monareng(30), Lerato Julia Moloi(33), Mothoduwa Paulina
Moloi(36), Nomasonto Christina Zulu(56), Nomasontsha Topsy Maduma(43), Bingo
Smith(55) le mora wa hae Rudi Smith(17).
Letona Thoko Didiza le buile lefung lena hore polao ya mahlatsipa a na e thefutse tlhahiso
haholo. “Bana e ne e le batho ba sebetsang mobung ba etsang bonnete hore naha ena e
hlahisa dijo, mme polao ya bona e tla thefula tlhahiso ya dijo haholo naheng” ho rialo Didiza.
Tonakgolo ya Foreisitata Sisi Ntombela, o boletse ha mahlatsipa a na a shwelletse lefela.
“Dipolao tsa mofuta ona di tlameha ho fediswa ka hohlehohle, bana ba setse e le dikgutsana
kajeno, mme ho ba entseng ketso ena ke kotlo ya kahlolo ya ho hlola tjhankaneng bophelo
bohle ba bona moo e ba tshwanetseng” ho hlalositse Ntombela.
