ANC Free State e boletse ha Tonakgolo Sisi Ntombela a amohetse ka diatla tse pedi qeto ya Komiti ya Phethahatso ya Mokga ya Profensi ya ho mo nyaola mosebetsi.
Selepe sena se boetse se rathile le Majoro wa Phethahatso wa Mangaung, Mxolisi Siyonzana. Qeto ena ya ho tlosa ditulong bobedi bona e nkilwe nakong eo Komiti ya Phethahatso ya ANC Free State e neng e tshwere lekgotla ho etsa maano le ho fumana ditlaleho tse fapaneng.
Ho ya ka Mongodi wa ANC Free State, Polediso Motshoeneng, komiti e emetse feela tataiso ho tswa ho komiti e kgolo ya ANC.
“ANC kahara Free State e rata ho leboha Macomrade ena ka karolo eo ba e bapetseng moo ba neng ba beilwe teng ke mokga,” ho rialo Motshoeneng.
Lekgotla la Komiti ena ya Phethahatso ya ANC Free State le tlile matsatsi a mmalwa feela kamora seboka sa ho kgetha boetapele ba Profensi. Seboka se ile sa kgetha Mxolisi Dukwana jwaleka moetapele wa ANC Free State.
Dukwana o ne a qothisana lehloka le Ntombela bakeng sa setulo sa beatepele ba ANC Free State.
Hara tse ding lekgotla tse ileng tsa tshohlwa lekgotleng ke phepetso ya tlhokeho ya mesebetsi mme qeto e bile ya ho tla kgothalletsa mmuso wa profensi ho theha menyetla ya mesebetsi bakeng sa batjha e ka bang 50 000 selemong se setjha sa ditjhelete.
Lekgotla lena le boetse la sekaseka dintlha tse kang boikitlaetso le metjha ya ho tebisa tsoselletso ya mokgatlo, phano ya ditshebeletso le marangrang a putlameng, ho aha makala a mokga nang le botsitso le ho matlafatsa ntwa kgahlano botlokotsebe le bobodu.
Jabu Mbalula o kgethilwe ho ba sebui sa mokgatlo profensing haele Saki Mokoena o kgethilwe ho ba Hloho ya tsa dikghetho.
Maloko a latelang a kgethilwe komiting ya tshebetso ya Profensi (PWC):
Mxolisi Dukwana
Ketso Makume
Polediso Motsoeneng
Dibolelo Mahlatsi
Mathabo Leeto
Gregory Nthatisi
Makhosini Msibi
Nthabiseng Gaorekoe
Nozililo Mashiya
Maggy Sotyu Maqueen
Letsohoa Elsabe Rockman
Thandixolo Khalipha
