La kajeno e tla be e le letsatsi la masisapelo le mahlomola ekasitana le mahlonoko ha Profensi ya Foreistata e bokana tshebeletsong ya sehopotso sa Letona la Thuto Foreistata, Tate Makgoe, hammoho le molebedi wa hae, Warrant Officer, Vuyo Mdi.
Tshebeletso ena ya sehopotso sa bobedi bona e hlophisitswe ke Mmuso wa Foreistata. E tla be e tshwaretswe University of Free State, South Campus Bloemfontein ho tloha ka hora ya leshome hoseng.
Makgoe le Mdi ba timelletse kotsing ya koloing mmileng o moholo wa N1 haufi le Winburg mesong ya Sontaha sa la 5 Hlakubele 2023.
Tshebeletso ena ya Profensi ya sehopotso e tla kamora Lefapha la Thuto le hlophise ditshebeletso tsa sehopotso diterekeng tse fapaneng tsa Foreistata maobane.
Warrant Officer Mdi o tla phomotswa borokong ba hae ba ho qetela ka Moqebelo ona oo re yang re o labile wa di 11 Hlakubele 2023. Tshebeletso ya lepato e tla tshwarelwa hona University of the Free State, South Campus, Bloemfontein ho tloha ka hora ya borobedi hoseng.
Ha e le Makgoe yena o tla bolokwa letsatsi le hlahlamang la Sontaha sa la 12 Hlakubele 2023. Tshebeletso ya lepato la hae le yona e tla tshwarelwa University of the Free State, South Campus, Bloemfontein ho tloha ka hora ya borobedi. Mofu o tla behwa Setsheng sa Bafu sa Bainsvlei, Bloemfontein.
Mmuso wa Foreistata o eletsa baahi ba ke keng ba tswella ho ya tshebeletsong ya lepato ho ka boha diketsahalo ho marang-rang a setjhaba a mmuso le ho di kanale tse fapaneng tsa ditaba.
