Tonakgolo ya Free State Sisi Ntombela ha a kgena feela empa e setse e tshohile le ho tlakasela ke ditaba tsa polao e masisapelo ya batho ba supileng (7) polasing e kantle ho Kestell e leng Limor.
Ba Ditshebeletso tsa Sepolesa sa Afrika Borwa ba tlalehile hore ke ba basadi ba tsheletseng(6), le monna a le mong ba fumanweng ba bolailwe tsatsing la Labohlano la la 15 Phupu 2022 ke monga polasi eo.
“Ke halefile haholo ke polao eo ya batho ba supileng Kestell. Le ha re hloka dintlha tse felletse ka se etsahetseng empa re tshwela ka mathe ketso eo e se nang botho ka hohlehohle, mme ka hona re ipiletsa ho lefapha la molao ho fumana ba etseng ketso ena” ho rialo Ntombela.
Ntombela o re o kgothaditswe ke ho utlwa hore Mokomishenara wa Sepolesa profenseng ena Baile Motswenyana o laetse baphuputsi ba hlwahlwa ho sebetsana le ketso ena ya polao, mme o boela o kgothaletsa hore Sepolesa se sebetse ka potlako e kgolo ka dipatlisiso tsa bona ho etsa bonnete hore bao ba amehang ketsong ena ba tobana le molao.
“Ketso tsena tsa polao di bonahala di ja setsi naheng ena kamora ho bolawa ha batho Orlando Soweto, Pietermaritzburg, le Alexandara.
“Ke buile le Letona la lefapha le amehang ho etsa bonnete hore malapa a amehileng a fumantshwa thuso ya tlhabollo ya maikutlo, re le mmuso wa Profensi re lakatsa ho ntsha mantswe a kutlwelo bohloko ho ba malapa a amahileng” ke Ntombela eo.- Tlaleho ka Moqolotsi wa Ditaba wa Puisano
