Jwalokaha kgwedi ya batjha ya Phupjane e kodumela kahara naha ya Afrika Borwa, re nka monyetla ona ho hlompha le ho ananela kgwedi ena ya batjha ka ditaba tsa e mong wa batjha e leng Lekgutsa Mbele, le tsa bophelo ba hae.
Lekgutsa Mbele o tswaletswe motseng wa Bohlokong Bethlehem e kahara profensi ya Free State, ka la 10 Pherekgong 1997. Mbele o thakgotse dithuto tsa hae sekolong sa Thabang, a fetela Matswathaka le Bodikela mme a di phethella Thabo-Thokoza tsohle tse leng motseng oo wa bohlokong. Selemong sena Mbele o dilemo tse 27 mme hara tse ding ke Seroki, Mongodi wa dibuka, Moitseki wa Setjhaba, Mongodi wa dipale, Moetsi le Mohlahisi wa difilimi, Sebui se Kgothatsang. Mbele ke mongodi wa buka ya Sesotho e bitswang ‘Di a Bela Di a Hlweba’ e hatisitsweng le ho phatlalatswa ka selemo sa 2019.
Mongodi enwa o re tlhase ya bongodi e mo fihletse kamora ho kopana le ba bang ba bangodi e leng A M Masoha, T Leseba le ba bang. “Ha e sa le e le kgopolo ya ka ho ngola dibuka ho tloha ke sa le sekolong dithutong tse tlase tsa poraemari, tlhase ena ha e sa le e le teng kahare honna ho tloha nakong eo ho fihlela ke ba ke ngola buka ena” ho rialo Mbele. Leetong la hae ho tsa bongodi Mbele o iphumane a thonngwa bakeng sa dikgau tse fapafapaneng tse kang;
- Unaba Awards,
- SATMA Awards 2017/18/19 le Live Your Dream SA 2017&18(Sethothokisi)
- Lengolo la Tlotlo (Poetry Out Loud-Sethothokisi)2018
- Golden Arts & Media Awards 2016 & Dihlabeng Poetry Competition 2017
Ntle le tsena tsohle Mbele ke motjha ya kgathallang tse etsahalang kahare ho naha yah abo ya Afrika Borwa. Mbele o bile lekgotleng la kgaso la SABC 3 & SABC News lenaneong le tsebahalang ka lebitso la Big Debate ho nkeng karolo dipuisanong tse mabapi le karolo ya Afrika Borwa mathateng a lefatshe le hore ana e amana jwang le ditokelo tsa botho. Lekgutsa Mbele o hlahile ho Big Debate, e phatlalalitsweng ka la 27 Phuptjane 2024. Se na se tla kamora hore e be e mong wa batjha ba memelwang ho ba karolo ya batjha ho tswa diprofinseng tsohle tse robong ka Phehisano e Kgolo e ntse e phethela Kgwedi ya Batjha le ho keteka dilemo tse 15.
“E bile thabo ho nna ho fumana memo ena, haholo-holo ke le moetapele wa mekgatlo e fapaneng e kang Modula-setulo wa Profinse ya South African Arts & Culture Youth Forum le Mookameli wa mokgatlo o bitswang Re Phethile Art Production le mekgatlo e meng. Ke ka lebaka leo ho ne ho le bohlokwa hore ke be karolo ya ona ke le moetapele wa batjha profensing. Ho bonahetse hore mosebetsi wa ka wa bonahala kaha ke ile ka iphumana ke le motjha ya neng a emetse Free State kaofela eseng feela motse wa heso eo ke phelang ho ona”. ho boletse Mbele
Pejana Mbele o hlahile mananeong a fapaneng a kang Daily Thetha SABC1, 1s & 2s Show ho SABC 1, Show Your Talent Mzansi ho DSTV channel 260 ho Mpuma Kapa TV le mananeong a mang a TV a Matjhaba le a Setjhaba. Ke kgopolo ya Mbele hore taba tsena tsa hae di tla tlisa kgothaletso ho batjha ba profensi ena ya Free State le nah aka kakaretso hore ba se dumelle maemo le ha e ka ba a jwang ho ba sitisa ho finyella toro tsa bona le ho se lahle tshepo bophelong.
