Tlaleho ka Moqolotsi wa Ditaba wa Puisano
Dihwai di setse di rwetse matsoho hloohong di bile eme le monna mateneng kamora mollo wa hlaha o tjhese boholo ba dikarolo tsa mapolasi a fapafapaneg masepaleng wa Maluti a Phofung mafelong a beke ena e sa tswa feta.
Letamong la Sterkfontein mollo o tjhesitse le ho senya dihektara tse 6000, polasing ya Monghadi Makhalemele, Saaihoek ke dihektara tse 800 tse senyehileng ho tse 1063. Haele polasing tsa Beulah Communal Land le Juliana ya Monghadi Mosia makgulo ohle a dihektara tse 145 a tjhele loro.
Ke mehlape e mmalwa e amehileng, mme ha ho motho ya lahlehetsweng ke bophelo.
Letona la tsa Temo le Ntsetsopele ya Dibaka tsa Mahae Elzabe Rockman, hammoho le Mookamedi wa Lefapha, Lefapheng la tsa Moruo, Ntshetsopele ya Dikgwebo tse Nyane, Bohahlaudi le Merero ya Tikoloho, Dr Mbulelo Nokwequ ba etetse mapolasi ana ho lekola tshenyo.
Letona le hlalositse hore basebetsi ba lefapha la hae ba tla etela mapolasi a amehileng ho lekola le ho etsa ditekanyetso tsa ditshenyehelo.
Monghadi Bernard Habig wa North-Eastern Free State Fire Protection Association o hlalositse ha sesosa sa mollo se sa tsejwe, mme a re tlhokeho ya disebediswa tsa ho tima mollo, thupello le ho tlaleha kapele ho qhoma ha mollo ke tse ding tsa diphephetso tse lebisang tahlehelong e kgolo.
