Mokgatlo o fanang ka mefuta e fapaneng ya thupello ka tsa boipaballo le tshireletseho dikotsing e leng Phela o Phedise Safety Skills Development o leng Sasolburg o lebisitse mantswe a tlotla ho Mokhanselara wa Setereke sa Fezile Dabi, Oupa Matwa.
Phela o Phedise e lebohile Matwa ka boitelo ba hae ba ho thusetsa ho tlisa le ho lefella batjha ba tswang a malapeng a se nang bokgoni kwetlisong setsheng sa kwetliso sa mokgatlo ona.
Molaodi wa Phela o Phedise, Piet Rankoe, o re ba ananela boitelo le tshehetso ya Matwa ya tlisa batjha ba fapaneng setsheng sa bona sa kwetliso kgwedi le kgwedi a sa kgethe lebala la motho hore ba tlo ithuta ka tsa tshireletso ho ya ka ditlhoko tsa mesebetsi e fapaneng mme ba batjha bao ba fumana mosebetsi kamora kwetliso.
Rankoe o hlalositse Matwa e le motho ya nang le boitelo, mosa, boikokobetso, lerato le tjantjello.
“Mohlanka enwa o itetse bakeng sa ho thusa ba se nang bokgoni ho sa kgathalatsehe hore ke ba morabe ofe. O fofa jwaleka ntsu kahare ho setjhaba sa rona.
“Dinyehelo tsa hae tse nang le bo Modimo kahare tsa ho thusa ho nyolla maemo a moruo le ho thusetsa maemong a qomatsi di ama pelo haholo. Ke thapelo ya ka hore e se e ka Makhanselara kaofela a ka ba jwaleka yena. Ha ho ka ba jwalo re ka fihlela dintho tse kgolo jwaleka naha.
“Ke ditabatabelo tsa rona jwaleka Phela o Phedise hore e se e ka mokga wa habo wa dipolitiki o ka mo thonya bakeng sa kgau ya “Best Urban Councillor”.
Ha a ananela mantswe ana a dithoriso le diteboho Matwa o boletse hore o qadile ho thusa setjhaba ka Phupjane monongwaha kaha e le mokhanselara wa mokga wa dipolitiki o kgathallang.
“Ha re ntse re etsa matsholo a dikgetho re kopana le batho ba phelang ka bofuma ebile hape ke bona batho bao ba re voutelang kapa ba re kgethang. Kahoo re ke ke ra thabela di voutu tsa bona feela ba sa bone diphethoho tseo ba lebang dikgethong bakeng sa tsona. Re ke ke ra iphapanya bona ha re le baetapele ba nnete mme ra ba hopola hape mohlang re yang dikgethong.
“Ke maikemisetso a ka ho bona batho bao ba fumana mesebetsi mme ba fetola maemo a malapa a bo bona e tle e le hore ba bone katleho le melokong e tlang,” ho rialo Matwa.
