Bibele e tshwantsha tshepo le sefate se kgaotsweng empa se hana ho shwa. Ho Jobo 14:7 – 9 e re leha sefate se ka kgaolwa empa tshepo e sa le teng bakeng sa sona ha fela se sa fotholwa metso.
Tshepo e hana ho shwa le ha ho se ho thwe e se e fedile empa yona e itsohele, e tsose monga yona, e mo hlohlelletse ho tswela pele ka bophelo le ho leka hape.
Ho sa kgathalatsehe hore ho etsahalang ka wena, tshepo e sa le teng bakeng sa bophelo ba hao
Tshepo e sa le teng bakeng sa hao, lelapa la hao, bana ba hao, batswadi ba hao,molekane wa hae, banabeno le ho tsohle tsa hao.Tshepo e sa le teng bakeng sa bokamoso ba hao.
Tshepo e sa le teng bakeng sa ditoro tsa hao ho sa kgathalatsehe hore ba o nyahamisitse hakae, ba o tshehile hakae le hore ba o somme hakae le hore ba o sebile hakae.
Tshepo e sa le teng bakeng sa ditjhelete tsa hao ho sa kgathalatsehe hore o sesa kahara dikoloto tse hae.
Tshepo ke eng na?
- Tshepo ke ho lebella seo Modimo a se tshepisitseng o sa tsitsinyehe.
- Tshepo ke ho ba le mamello e tiileng ya hore seo o se batlang se tla etsahala.
- Tshepo ke ho ema o tiile o emetse se itseng se etsahale kapa sepheto se itseng
- Tshepo ke ho ba le mamello ya ho emela kapa ho phehella ho batla seo o se batlang ho fihlela se etsahala.
- Tshepo ke ho ikgothatsa ka hore seo o se lebeletseng se tla etsahala.
Ho ya ya ho ye ho fihle nako eo tshepo e seng e batla e fela le moo e seng e fokola teng le moo e seng e fedile tu! Haholo jwang ha ho sa etsahale letho. Ha e se e le jwalo e se e tshwana le sefate se kgaotsweng.
Feela taba ke yena, le ha e bonahala e ka e fedile empa ha e ya shwa. E hloka feela se kang tlhase ya mollo hore e hotetswe feela o tla bona ha e boela e tuka. E tla boela e fetoha lekabe la mollo. Jwaleka sefate se bonahala eka se fedile mohlang se fumanang metsi se a hloma hape, le tshepo e jwalo.
Haeka tshepo e ya fela balehela sebakeng seo o tla ho fumana metsi a tla nosetsa tshepo ya hao. E ba moo o tla fumana dikgothatso e seng dikobiso, e seng dikomang.
Modimo ke mohlodi wa tshepo ya rona – Baroma 15:13. Modimo a ke a tsoseletse tshepo ya eo a sa felletswe ke yona. A tsose le eo e seng e shwele.
Qoba dintho tse fokodisang tshepo ya hao le tse ka batlang ho bolaya tshepo ya hao e leng tseng tse latelang:
- Menahano e sa lokang
- Ho tsepamisa ho dintho tse phehisanagng le maikemisetso le maikutlo a matle a hao
- Menahano ya dintho tse nyahamisang
- Mantswe a nyahamisang
- Ho nahana haholo ka maemo a ha jwale ao o shebaneng le wona
- Tsela eo o shebang bophelo ka yona. O se ke wa sheba bophelo ka maikutlo a seng a hlotswe.
- Sebaka seo o phelang ho sona
- Batho bao o leng haufi le bona
Abrahama o bile le tshepo moo tshepo e seng e le siyo teng. Taba tseba re di fumana ho Baroma 4:18 mme yona e re, “Abrahama o dumetse ka tshepo, leha ho ne ho se sebaka sa ho tshepa, hore o tla fetoha ntata ditjhaba tse ngata, ka seo a se boleletsweng, ha thwe: Leloko la hao e tla ba le lekalo.”
