Mosebetsi wa ho matlafatsa phepelo ya metsi dibakeng tse ngatanyana tsa Tumahole le Parys o se o thakgohile.
Sena se tla kamora hoba Majoro wa Phethahatso wa Masepala wa Selehae wa Ngwathe, Victoria De Beer-Mthombeni, ya neng a feleheditswe ke ditho tsa komiti ya Majoro le Makhanselara a di ward a thakgole projeke ya ho kenya peipi ya metsi ho tloha setsing sa phepelo ya metsi ho ya ho letangwana (reservoir) la pele le sebakeng sa Ghana, Tumahole. Mosebetsi ona wa ho thakgola Projeke ena o bile ka Laboraro la beke e fetileng.
Ho ya ka Mmuelli wa Masepala wa Ngwathe, Steve Naale, projeke ena e diatleng tsa sehlopha sa basebetsi ba Masepala ba sebetsenang le ditaba tsa metsi mme e lebelletswe ho nka bonyane dikgwedi tse tsheletseng.
Naale o boletse hore Majoro De Beer-Mthombeni o lebisitse mantswe a diteboho ho bohle ba nang le seabo projekeng ena. “O lakeleditse basebetsi ba Masepala katleho projekeng ena eo maikemisetso a yona e leng ho ntlafatsa phano ya ditshebeletso, haholo-holo phepelo ya metsi,” ho rialo Naale.
Haele motsamaisi ditabeng tsa metsi, Mokete Phele o boletse hore ho ntse ho e na le diprojeke tse ding hape tseo haufinyana ba tla di thakgola ho leka ho rarolla bothata ba phepelo ya metsi kahara Ngwathe.
Ho sa le jwalo, Masepala wa Ngwathe o tsebisa baahi hore o ntse o tshwarane le mosebetsi wa ho ntlafafatsa marang-rang a tlhwekiso ya metsi setsing sa yona sa phephelo ya metsi. Sena ke ho etsa bonnete ba hore setjhaba se fumana metsi a hlwekileng. Baahi ba hlokomediswa hore sena se ka ba le tiehiso phepelong ya metsi.
“Ho tingwa ha phepelo ya motlakase (loadshedding) le hona ho baka tiehiso mosebetsing wa phetela projeke ena empa masepala o motjheng wa ho fumana generator,” ho boletse Naale.
