Tlaleho ka Moqolotsi wa Ditaba wa Puisano
Matsatsi a loyana Masepeleng wa Metsimaholo. Tangtang e kganngwe ke lerole ho setse feela hore ho kgaohe moo ho kgwehlang tsekong ya setulo sa Bomajoro ba Masepala ona o kenyeleditseng kahare Sasolburg, Deneysville le Oranjeville.
Ho nkile Molekgotla Jack Malindi matsatsi a supileng feela ho kotsomala se maratswana sa Bomajoro, athe ha e le moifo wa Komiti ya hae ya Majoro o nkile feela matsatsi a mahlano o behilwe ditulong.
Lekgotla le Phahameng la Dinyewe la Free State le fane ka taelo ya hore Majoro ya sa tswa kakalatswa, Molekgotla Jeff Zwane a kgutlisetswe maemong a hae.
Mmuelli wa Masepala, Dr Gino Alberts, o boletse hore Masepala wa Metsimaholo o hlompha taelo ya kgotla mme o tla ikamahanya le qeto eo ya Lekgotla le Phahameng la Dinyewe la Free State.
O boetse a re Masepala o tla emela kahlolo e felletse ya Lekgotla la Dinyewe e tlang ho tswa nakong ya matsatsi a leshome pele o ka etsa qeto ya hore ke efe mehato e tla nkuwa.
Lekgotla la Dinyewe le qhadile qeto ya Lekgotla la Motse la Metsimaholo ya ho tlosa Zwane setulong kamora hoba mokga wa African National Congress o hlahlele tshisinyo ya ho hloka tshepo ho Majoro enwa wa mokga wa Democratic Alliance. Sena se ile sa etsahala kopaneng ya Lekgotla la Motse ya la 1 Phato 2023.
Beke tse pedi kamora ho moo yaba Lekgotla lena la Motse le kgetha Malindi jwaleka Majoro e motjha. Matsatsing a mabedi a feela a kgethilwe, Malindi a phatlalatsa moifo wa Komiti ya hae ya Majoro e kenyeleditseng kahare Balekgotla ba ANC le Economic Freedom Fighters, ekasitana le BoMajoro ba mehleng, Lindiwe Tshongwe le Selloane Motjeane.
Kamora ho tloswa ha Zwane maemong a hae, mokga wa hae wa Democratic Alliance o ile wa leba lekgotleng la dinyewe ho phephetsa qeto eo.
