By Pitso Moloi
“Ha ho setjhaba ntle le malapa.” Ona ebile molaetsa wa mokete wa ho keteka Letsatsi la Matjhaba la Malapa. Mosebetsi ona o bile diahelong tsa Agape sebakeng sa Honeyville se Makoane, Qwaqwa.
Mekgatlo ka mekgatlo e ile ya bokana ho keteka letsatsi leo hantlentle le ketekwang ka la 15 Motsheanong.
Ho ketekwa ha letsatsi lena e ne e le ho toboketsa bohlokwa ba malapa le molemo wa ona.
Hara mekgatlo e bileng teng ke Lefapha la Ntshetsopele ya Setjhaba, Dihlabeng Development Initiative, Child Welfare South Africa (Qwaqwa) le Agape Foundation for Community Development.
Ha a fana ka puo Moemedi wa Lefapha la Ntshetsopele ya Setjhaba, Mohlomi Lerato o itse: “Taba ya malapa e bohlokwa haholo empa ha e tsotellwe jwaleka ntwa ya bong (GBV), HIV le tse ding leha e le mona malapa e le ona a bukellang hammoho setjhaba.
A eketsa ka hore malapa ke ona a ahang setjhaba. Qaleho ya setjhaba sefe kapa sefe ke lelapa.
Moruti Motjale o ile a kgothatsa bohle ho matlafatsa tumelo ya bona le maemo a boitshwaro bo botle hore ba tle ba be le dikamano tse ntle tsa lerato.
Mokone Motaung ya bileng teng moketeng o boletse tjena,”Ona ebile mofuta wa pele wa ketsahalo eo ke bileng ho ona. Ke labalabela eka batho ba ka tsamaya mekete e tjena ka bongata ho iphumanela tsena e tla thusa ho bopa malapa a bona.”
