Ho ngodiswa ha barutwana bakeng sa isao ho se ho butswe profenseng ya Free State. Ho tloha kajeno ho fihlela ka mafelong a Phato batswadi le bahlokomedi ba buletswe monyetla ho ngodisa bana ba tla beng ba qala ho kena sekolo, ba lebang dikolong tse phahameng le ba fetelang dikolong tse ding.
Lefapha la Thuto Free State le kgothalletsa batswadi le bahlokomedi ba bana ho sebedisa monyetla ona wa pulo ya boingodiso bakeng sa selemo sa 2024 ho ngodisa bana ka nako.
Lefapha lena le ka tlasa tsamaiso ya Letona le letjha Makalo Mohale le hlalositse hore ho phethela tshebetso ena ya boingodiso ka nako e behilweng ya kgwedi tse hlano ho tloha ka la 1 Mmesa ho fihlela ka la 31 Phato ho tla beha Lefapha maemong a matle a ho ka thakgola dithuto ka tsatsi la pele la dikolo selemong se tlang sa 2024.
Kamohelo ya bana dikolong ho ya ka dilemo e tla tsamaya ka mokgwa ona:
-Grade R ke dilemo tse nne(4), ngwana a ya dilemong tse hlano ka la 30 Phupu
-Grade 1 dilemo tse hlano(5), ngwana a ya dilemong tse tsheletseng(6) ka la 30 Phupu
Ditokomane tse hlokehang ke tsena:
- Lengolo la tswalo
- Karete ya ente
- Lengolo la phetiso kapa raporoto ya sekolo seo ngwana a tswang ho sona
- Ditokomane tsa boitsibiso tsa batswadi
- Lengolo ya tumello ho ithuta ho bana ba tswang ka ntle ho naha ena
Batswadi ba boela ba tsebiswa hore kamohelo ya bana dikolong e tla sebetswa ka mokgwa wa ho amohela le ho thusa ba fihlileng pele.
Lefapha lena la Thuto le tekile ditekanyetso tsa lona tsa ditjhelete tsa 2023/24 ka la 14 Mmesa 2023 motseng wa Zamdela Sasoburg.
