Tlaleho ka Ouma Mabaso
Lwetse ke kgwedi e simollang sehla sa selemo kamora sehla sa mohatsela wa mariha. Ke kgwedi eo batho naha ka bophara ba e amohelang ka thabo le menyaka. Ho bile jwalo setsheng sa bana ba banyenyane e le crèche ya Itsoseng se ka Amelia, Sasolburg.
Creche ena e ketikile tshimoloho ya sehla se setjha ka thabo le menyakwe meahong ya sekolo ka Labohlano le fetileng. Sekolo sena se ka tlasa tsamaiso ya Mothehi le Mosuwehlooho Mamoholo Mirriam Mokoena.
Mokoena o hlalositse hore kamora ho ja lekomo le batswadi le matitjhere ba bone ho le molemo ho keteka letsatsi le bana ba bona. “Re kgethile ho keteka letsatsi lena kaofela re le batswadi, matitjhere hammoho le bana ho kgotalletsa le ho bontsha lerato le kutlwano, re kopile batswadi ho tla ka diphehiso tsa bona ho thusetsa moketjaneng ona” ho rialo Mokoena.
Menyakwe ya tsatsi leo e ne e kenyeleditse kahare dimenyemenye, metantsho le ho kgethwa ha Mr le Mrs Itsoseng ka mokgwa wa ditlhodisano tsa bomma-botle. Anele Chasane o tswelepele mme ke Mr Itsoseng, ha e le Amohelang Koker yena a ikgapela sekola sa Mrs Itsoseng.
Mosuwetsana Puleng Mokoena o boletse ha a thabile haholo ke mokete o motle jwalo. ” Ke thabisitswe le ho feta ke hore bobedi Mr le Mrs Itsoseng ba tswa ka phaposing ya ka” ho rialo Mesuwetsana Mokoena ka lethabo le leholo. Mamoholo Mokoena o lebohile tshebedisano mmoho haholo mahareng a batswadi le matitjhere ho etseng bonnete ba hore mosebetsi o motle o tswelapele.
