Tlaleho ka Moqolotsi wa Ditaba wa Puisano News
Masepala wa Selehae wa Mafube o kenyeleditseng kahare ditoropo tsa Frankfort, Villiers, Cornelia le Tweeling o setse o se na Motsamaisi ya ka Sehloohong (Municipal Manager).
Eo e neng e le Motsamaisi wa Sehlooho masepaleng ona, Advocate Mothusi Lepheana, o hatile kosene.
Lepheana o hata kosene tjena kamora ketelo e nngwe hape masepaleng ona ya Letona la Mebuso ya Kopanelo le Ditaba tsa Marena, Saki Mokoena, bekeng e shweleng.
Masepala wa Mafube ke o mong wa Bomasepala ba tobaneng le diphepetso tse kgolo tse kenyeleditseng ka hare ho hloleha moralong wa ntlafatso tsa maemo a ditjelete, ho bokella tjhelete tsa ditefiso le lekhetho, phano e sa tsitsang ya metsi, le ho se lefe tjhelete ya letlole la basebetsi hara tse ding.
Lekgotla la Motse la Mafube le ile la epa pitso ya lona hona beke e fetseng ho sekaseka le ho amohela ho itokolla ha Lepheana.
