Mathwaso a selemo sa Basotho a fihlile. Ke kgwedi e ntjha. Kgwedi ya Phato.
Kgwedi ya Phato ke e bohlokwa haholo setjhabeng sa Basotho kaha ke kgwedi ya mathwaso a selemo sa bona. Kgweding ena Basotho ba leboha Tlatlamatjholo(Modimo) kamora mosebetsi wa kotulo kapa tjhai.
Le monongwaha e tla ba metjeko, medidietsane le mokorotlo ha tjhaba sena sa Rantsho se tla be se keteka mathwaso a selemo sa bona. Lefapha la tsa Dipapadi, Bonono, Setso le Boithapollo Free State le boletse ha mokete ona o tla ketekelwa Basotho Cultural Village kantlenyana feela le Qwaqwa ka la 06 Phato 2022.
Letona lefapheng lena Limakatso Mahasa o kgothaleditse Basotho bohle le ka naheng ya Lesotho, ha mmoho le barati ba setso ho ba moketeng ona. Dibini tsa mmino wa setso le wa Sesotho, mehobelo, dijo tsa setso tsohle e tla ba karolo ya mokete ona. Lerole le tla thunya le ka dipapadi tsa setso tse kang morabaraba, kgati, ho kalla, diketo le tse ding tse ngata.
