Ka mantswe a rona re ya aha kapa re ya heletsa. Re ya phedisa kapa re ya timetsa. Re ya hlohonofatsa kapa re ya rohaka. Re ya phahamisa kapa re ya diha. Re ya lokolla kapa re ya tlama. Re ya kgothatsa kapa re ya nyahamisa. Re ya tsota kapa re ya seolla. Re bua nnete kapa mashano.
Hape ka mantswe a rona re ka ipulela mamati kapa ra ikwallwa mamati. Re theha setswalle kapa re iketsetsa lebotho la dira. Re ka hlomphuwa kapa ra hlomphollwa ka mantswe a rona. Le wena ka bo wena o ka iphedisa ka mantswe a hao kapa wa ipolaya ka mantswe a hao.
Hlokomela mantswe a hao ha o buwa le mang kapa mang. E ka ba motho e moholo ho wena. E ka ba e monyenyane ho wena. E ka ba thaka ya hao. E ka ba molekane wa hao. E ka ba moratuwa wa hao. E ka ba ngwaneno. E ka ba motswadi wa hao. E ka ba ngwana wa hao. E ka ba morui kapa mofutsanyana. E ka ba mohiri wa hao. E ka ba moseleetsi wa hao. Ekaba ya rutehileng kapa ya sa rutehang. Ekasitana leha e ka ba motho eo o mo nyatsang ka ho fetisisa.
Sebedisa mantswe a hao ka nepo ha o bua le mang kapa mang hoba ka nako tse ding motho eo o buang le yena e ka nna ya e ba yena monga kapa mokamedi wa hao ka moso. E mong e ka nna ya e ba yena ya tla tla a o bulela lemati la katleho ya hao. E mong o tla hloka thuso ya hae ka moso. Bothata e tla ba ba hore o tobana le yena jwang ha o ile wa mo kgahlapetsa ka mantswe kapa wa mo hlompholla ka mantswe kapa wa mo seolla ka mantswe kapa wa mo etselletsa. O tla reng ho e mong ha o teana le yena a le ho panel ya interview moo o tla beng o bitsitswe teng bakeng sa interview.
Ka mantswe a hao o ka bontsha bohlale ba hao kapa bothoto ba hao jwalekaha re bala mantswe a Bibeleng ho Moekelesia 10: 12 a reng: “Mantswe a tswang molomong wa ya bohlale a kgahlisa kahohle, empa melomo ea lewatla e a le timetsa.”
Kgetha mantswe ka bohlale ha o buwa e tle e le hore batho ba kgahlwe ke polelo tsa hao. Mantswe a monate, a matle, ha a kgahlise feela empa a ya holela. A hohela tlhompho. A hohela ditlhohonolofatso. A hohela batho ba bohlale. A hohela dintho tse ntle. A hohela menyetla e mengata. A hohela le setswalle sa mankgonthe. A hohela bolatedi ho bao e leng baetapele. A hohela bareki ho beng ba dikgwebo.
Sebedisa mantswe ka nepo. Sebedisa mantswe a nepahetseng. Sebedisa manstwe a bohlale. Sebedisa mantswe a hlwekileng. Sebedisa mantswe a maphodi. Sebedisa a thabisang pelo le maikutlo a motho.
Hopola hore lentswe ha le kgutle. Ha le tswile, le tswile. Le tshwana le lebese ha le qhalehile. Ha ho kamoo le ka boelang le bokellwa kateng.
Se thabele ho hlokofatsa motho e mong ka mantswe hobane ho tla ba bohloko mohlang a o hopotsang wona.
Se bue dintho tseo o tlang ho di swabela hosasane. Se bue dintho tse tla etsa o swabe ha o kopana le bao o di buileng ho bona. Ho bua ho bonolo empa polelo ka nngwe e na le moputso wa yona.
Phela ka bohlale ka ho sebedisa mantswe ka nepo.
Pastor Matefu Mokoena is the Presiding Pastor of Apostolic Faith Mission of South Africa, Batho Assembly in Bloemfontein. For prayer requests and counselling contact him on whattsapp – 083 563 5062. You can also follow him on facebook: https://web.facebook.com/matefu.mokoena.1
