“Jehova, Modimo wa ka, e kgolo hakakang palo ya mehlolo le ya merero eo o re etseditseng yona! Ha ho ya ka e lokodisang pela hao; leha ke rata ho e bolela le ho e bala, e be e fete palo.” – Pesalema 40:5
Banabeso leha ho bonahala eka Modimo ha o re letho ka maemo ao re tobaneng le ona hona tjena empa a ke re hetle morao, re lekodisise, re ikgopotse, re ipatle re ipatlisise. Re boele hape re itjhebisise, re itokele, re shebe ka ho le letona le letshehadi ho rona. Re boele re shebe moo re le teng hona jwale. Re tla elellwa hore haesale Modimo a le motle maphelong a rona.
Hetla morao hape o lekodisise kamoo selemo sena sa 2024 se tsamaile kateng. O bale feela tse ntle. O ke o bale feela le tse monate tse o etsahalletseng. Leha ho bile bohloko. Wa lla. Wa lla. Empa ho na le tse ntle le tse monate tseo o kgonneng ho di bala.
Botle bo ka hodimo ho tsona kaofela ke ba hore o kgonne ho tsoha letsatsing ka le leng la selemo kaofela ho fihlela kajeno ke mona o sa eme, o sa le teng, o ntse o phela. Satane le mahlahana a hae o ne a itse o tla be a o fenethile pele selemo sena se fella empa o mo hlotse.
E, ke ya dumela hore ka nako tse ding o ne o tsoha o na le matetetso, bophelo bo se hantle empa matla a Modimo a ntse a le matla hodima ho kula hoo.
Ako nke nako o thuise ka Modimo ya o entseng hantle a o hlohonolofatsa mme o pake le wena o re ka nnete “e kgolo hakakang palo ya mehlolo le ya merero eo o re etseditseng yona!”
Ako lokolle le leleme la hao le ke pake tse ntle. Ako lokolle le leleme la hao hore le bine thoriso. Ako lokolle le leleme la hao le thelle le bine menyanyako le otle le melodi ya nyakallo e seng kodiyamalla.
Tlatsa melomo ya hao ka diteboho o tle o bone botle ba teboho. Bolela tse ntle o tle o bone ha o atelwa ke botle. Bolela tse monate o tle o bone ha o hohela monate. Tsheha o tle o bone ha o hohela ditsheho. Bina dipina tsa thabo o tle o bone ha o tlalwa ke thabo.
Ho fihlela neng re tla bua ka tse bohloko re iphapanyetse tse ntle. Modimo e nnile ya e ba Modimo maphelong a rona. E tla dula e le Modimo. Botle le bokgabane ba hae bo bonahala le maemong a sa batleng ho re dumella hore re bo bone. Tse ntle le tse monate di bile teng tsona mme re leboha Modimo ke hona.
Ke le lakaletsa keresemese e monate le selemo sa 2025 se tletseng thabo, katleho, mahlohonolo, bophelo bo botle le phethahalo ya ditabatabelo le ditoro tsa lona. Morena wa kgotso a le hlohonolofatse.
