Tlaleho ka Ouma Mabaso
Sebohodi se tummeng sa Lesedi FM Seipati Seoke ya tsebahalang ka Twasa o eleditse basadi ho se dumelle diketsahalo tse fetileng le maemo a bileng teng kgale maphelo a bona ho sitisa bokamoso ba bona.
O eleditse tjena nakong eo e neng e le moreri tshebeletsong e ikgethileng ya letsatsi la basadi e neng e tshwaretswe kerekeng ya City of Love and Restoration Full Gospel Church e Zamdela Sasolburg tlasa botsamaisi ba Moruti Thabiso Mashiloane.
“Jwaloka mosadi ha o hloke monna hore o be le ntlu, koloi kapa hore o tswelle bophelong” ho rialo Seoke.
Sebui sa letsatsi e bile Letona mmusong wa profensi ya Free State Toto Makume o hlalositse ha a tla bua haholo ka bohlokwa ba bomme. “Bomme ba na le tshutsumetso ya pele baneng, ba na le tshutsumetso ya pele bokamosong ba bana hobane bokamoso bo matsohong a bana ka hoo re tlameha ho a ananela bohlokwa ba bona kahare ho setjhaba sa rona” ho rialo Makume.
Ho ya ka Makume, nakong ya kgatello ha balwanedi ba ntwa ba baleha naheng ba bolawa ba bile ba kwallwa ditjhankaneng e bile bomme ba ileng ba e hlanaka ba beselletsa mollo wa tokoloho hore o se time.
“Sesotho se re ‘Mosadi o tshwara thipa ka bohaleng’ mme mantswe a jwalo a ne a ke ke a tswa fela e bang ba ne ba se sebete, ba sena le tlhokomelo le boikarabelo. Ke lakatsa ho kgothatsa le ho tiisa bomme ka lentswe le tswang bukeng e halalelang ho Baroma 5:3-5, e buang ka tshepo. Buka ena e bua ka hore mamello e aha sebopeho, sebopeho se aha tshepo” ho eketsa Makume.
Motshwaruwa wa mehleng, Lerato Manaka o nkile sebaka le ena ho bua ka tsa bophelo ba hae, e le tsela ya ho boela a eletsa batjha. “Ke ile ka hola ke na le tshabo ya ho ha nwa, batswadi ba ka ba ile ba nnyahlatsa ka kena Univesiting ya Johannesburg moo ke ile ka kopana le metswalle e mengata re sa eletsane ka tse mpe tseo re di etsang” ho rialo Manaka.
Nakong eo a ntseng a le sekolong Manaka o hlalositse hore ke ha ntate wa hae a hlokahala, mme taba eo le ya ho fihla ha ntate wa bobedi bophelong ba hae ha di a fumana sebaka sa ho dula pelong ya hae. “Ke ne ke na le kgopolo ya hore re tla ba na le kutlwano e tebileng jwalo ka ntate le moradi, ntate a be teng mohla lenyalo laka, empa ha ho a ka ha eba jwalo” ho rialo Manaka.
“Ka nako eo ke ne ke le ngwana,ke le nnotshi toropong tse kgolo kwana ke hloka le motho eo nka buang le yena, ke moo ha mmoho le metswalle re qadileng ho tsuba, ho nwa jwala, ho tsamaya meketjana, le ho kena dikamanong tsa lerato le batho ba bangata, hore re lebale mathata a rona a bophelo. Ke ile ka ba hlonolofatswa ka mosebetsi o motle wa ho ba hloho ya Diakhaonto (Head of Accountant) ho e nngwe ya di khampani tse kgolo, mme maemo ao a etsa hore ke fihlelle tjheleteng ya mongaka.
“Ka ba ka la mathata ao ke neng ke tobane le ona ka iphumane ke utswa tjhelete akhaonteng ya mongaka mme qetellong ka tshwarwa ke le dilemo tse 29, ke na le bana ba bararo. Ka fellwa ke mosebetsi ka lahlelwa tjhankaneng dilemo tse 12, dilemo tse nne di ile tsa fanyehwa mme ka sala ka tse robedi” ho eketsa Manaka.
“Batho ba bomme ne ke le bolella taba ena ya ka hore le kgone ho utlwisisa hore diqeto tseo re di etsang di lebisa hokae” ho rialo Manaka.
Moruti Thabiso Mashialoane o lakaleditse bomme tse ntle fela ha ba keteka letsatsi le kgwedi ena ya bona. “Ke itse re be ba pele ho keteka letsatsi lena la bomme, re leboha tshutsumetso ya bomme setjhabeng sa rona” ho rialo Mashialoane.
